لما بتشتري بلى deep groove ball bearing هتلاقي عليها رموز زي 2Z أو 2RS أو 2RSH أو 2RSL وبتلاقي فرق السعر بين البليه والتانيه كبير جدا ممكن يوصل للضعف أحيانا .. الرموز دي معناها إيه واختار انهو نوع فيهم ؟ تعالوا نشوف الموضوع بالتفصيل
👈 الرموز دي كلها بترمز لنوع ال cover إللي راكب علي البليه .. ممكن يكون الظرف دا صاج (معدن) أو كاوتش (مطاط) أو ممكن يكون ميكس من آلأتنين (مطاط بداخله معدن)
⏹️ طب أمتي اختار بليه بظرف كاوتش أو مطاط وأمتي اختارها بظرف صاج أو معدن ؟ 🤔
👈 البليه deep groove ball bearing بيكون عليها cover من ناحيه واحده او من الناحيتين واحيانا تكون بدون cover خالص
👈 ال cover دا عشان تعرف نوعه وعدده هتبص علي العلبه بتاعه البليه من بره وهتلاقي جنب رقم البليه واحد من الرموز دي
➡️ 2z أو ZZ
ودا معناه إن البليه دي راكب عليها ظرفين معدن أو صاج وبيسموها shield
➡️ 2Rs
ودا معناه إن البليه دي راكب عليها 2 ظرف كاوتش أو مطاط rubber وبيسموها sealed نظرا لعزلها العالي
➡️ Z
ودا معناه إن البليه راكب عليها ظرف واحد معدن والجانب الاخر مفتوح وبتتسمي one shield
➡️ Rs
ودا معناه إن البليه راكب عليها ظرف واحد مطاط والجانب الاخر مفتوح
➡️ 2RZ
بيكون الظرف من المطاط ولكن بداخله معدن وبيجمع بين مزايا النوعين مع بعض
➡️ فيه نوع إسمه 2RSH واخر اسمه 2RSL ودا افضل من حيث العزل لإنه بيزود نقطه التماس مع الظرف الداخلي وبالتالي عزل أفضل دا غير إن الظرف فيه جزء معدن ولكن في المقابل احتكاك اعلي
طب أمتي اختار الظرف الكاوتش وأمتي اختار الظرف المعدن؟؟ 🤔
⬅️ الظرف الكاوتش بيمتاز بالعزل العالي high sealing ودا بيمنع دخول الاتربه والعوالق contamination وبيمنع بشكل كبير دخول الرطوبه والمياة داخل البليه وعشان كدا بستخدمه في التطبيقات إللي بتكون معرضه بشكل كبير للرطوبه أو للمياه أو حتي الاتربه و الرواسب زي ال blowers والمراوح وغيرها
👈 يعيب هذا النوع من البلي إن الاحتكاك بيكون كبير بين البليه وال cover (لو لفيتها بايدك هتلاقيها تقيله ف الدوران) ودا بيقلل من استخدامها في المواتير الكهربيه لأن الاحتكاك دا هيسبب حمل إضافي علي الموتور وكمان هيولد حراره داخل المحرك
👈 كمان يعيبها إنها لا تتحمل الحرارات العالية نسبيا علي عكس البليه إللي ليها غطا معدن ولا تتحمل الصدمات علي عكس النوع الأخر
⬅️ النوع التاني وهو البليه ذات الغطاء المعدني 2z ودي بيكون فيه خلوص بسيط بين ال cover والبليه نفسها بحيث يسمح بدخول الزيت واحيانا الشحم للداخل عن طريق عمليات التزييت والتشحيم الخارجيه
👈 تمتاز بالاحتكاك القليل نسبيا وبالتالي تعمل في السرعات العالية وتتحمل الحراره العالية بشكل كبير (حتي 150 درجه واحيانا فيه أنواع بتوصل ل 200 درجه)
👈 عشان كدا بنستخدم البليه دي في اغلب التطبيقات إللي بكون محتاج زيت مستمر يدخل للبليه
⬅️ لو افترضنا إن ظروف التشغيل خاليه من الحراره العالية وايضا من الرطوبه و الرواسب هختار مين فيهم؟ 🤔
غالبا هنختار ال 2Z عشان التكلفه لأنها بتكون أرخص من ال 2RS بنسبه من 20 : 30 ٪ 😉
⬅️ طب أمتي بحتاج بليه بظرف واحد سواء كاوتش أو صاج أو بدون غطا اصلا ؟ 🤔
👈 لو افترضنا مثلا إن عندي جيربوكس وفيه زيت أو شحم احيانا بسيب الظرف السفلي راكب وبشيل الظرف العلوي لتسهيل دخول الشحم والزيت أو بشتري بليه من السوق بظرف واحد (لتقليل التكلفه لأنها بتكون أرخص ب 10 جنيه تقريبا) والاحتكاك برضو
👈 واحيانا بحتاج بليه بدون أي ظرف إذا كانت هتركب داخل housing ومعرض للشحم أو الزيت بشكل مستمر
Copied
https://www.linkedin.com/posts/mohamed-zedan-6b8020123_%D9%84%D9%85%D8%A7-%D8%A8%D8%AA%D8%B4%D8%AA%D8%B1%D9%8A-deep-groove-ball-bearing-%D9%87%D8%AA%D9%84%D8%A7%D9%82%D9%8A-activity-7218540155081506817-eI6B?utm_source=share&utm_medium=member_android