غسل الجنابة وغسل الحيض والنفاس.. مفيش فيهم هزار.. الأغسال دي واجبة وعقوبة تأخيرهم شديدة ..

[Osama Badr]

غسل الجنابة وغسل الحيض والنفاس.. مفيش فيهم هزار..
الأغسال دي واجبة وعقوبة تأخيرهم شديدة ..
مش واخد بالك أن بيترتب على تأخير الغسل الواجب ضياع فروض صلاة؟!
أعرف بنت بتكسل تغتسل من الحيض وبناء عليه مبتصليش..
وسمعت عن واحد بيصلي وهو جنب عادي ولا في دماغه..
بطاقتك الشخصية أو رخصة القيادة انتهت واتأخرت عن ميعاد التجديد..
بتروح تجددها ومش بس كده كمان بتدفع غرامة..
اوعى تكون مفكر أن تأخير غسل واجب هيسقط من عليك فرض الصلاة.. لا طبعًا.. تأخيره حرام والصلاة ماسقطتش وكمان حرام عليك...
العادة السرية موجبة للغسل بالإضافة لأنها حرام أصلاً وكبيرة..
الغسل الواجب لازم المياه تعم كل الجسد بما فيه شعر حضرتك.. وفكرة انك عاملة شعرك بيبي ليس مثلاً فمش عوزاه يتبل.. ده مش عذر.. لازم شعرك يتغسل ولو متغسلش فانت لم تطهري وصلاتك باطلة..
وكذلك المانيكير والتاتو وأي حائل يمنع وصول الماء للبشرة.. لازم يتشال قبل الغسل أو الوضوء..
يا أهل الخير الغسل الواجب ده بديهيات الدين.. وهو من الفروق الجوهرية بين المسلمين وأهل الديانات الأخرى أو الملحدين..
"إن الله يحب التوابين ويحب المتطهرين"

#أ_ب_فقه | إزاي نغتسل .. ؟!

موضوع الغسل من الجنابة أو الحيض طبعًا من أهم الحاجات اللي لازم المسلم والمسلمة يتعلموها لأنه حاجة متكررة ومرتبطة بعبادات عظيمة لا تتم إلا بها زي الصلاة .

= أولًا : امتى يجب الغُسل ؟
1️⃣ عند خروج المني من الذكر أو الأنثى وهو مستيقظ ولو من غير جماع ، أو وهو نائم "اللي هو بيسموه الاحتلام"

2️⃣ بمجرد التقاء الختانين، يعني الإيلاج وحصول الإجماع ، حتى ولو لم يحدث إنزال للمني .. خلي بالك

3️⃣ انقطاع الحيض والنفاس للمرأة

4️⃣ دخول الكافر في الإسلام ، يغتسل مش عشان أسلم ، لكنه غالبًا لن يسلم من جنابة ، لكن لو كان قبل دخوله الإسلام مش جنب يقينًا .. يبقى لا يجب عليه

5️⃣ غُسل الميت ، وده واجب كفاية على المسلمين مش عليه ، يعني واجب عليهم يغسلوه

= طيب الاغتسال يكون ازاي ؟!
👈 بص هو فيه صفتين للاغتسال ، واحدة مختصرة وتجزيء ، وهنسميها صفة الغسل الواجب ، يعني تعمل كدة وتطلع تبقى تمام عملت الواجب .. واللي هي :

1️⃣ النية :
لاااااااازم تنوي - بقلبك طبعًا - إنك بتغتسل لرفع الجنابة
يعني لو دخلت خدت دش ، ولما طلعت افتكرت إنك كنت جنب ، ماتقولش خلاص كدة أنا اغتسلت وكله تمام .. لأ
النية ركن .. لازم تنوي انك بتغتسل لرفع الجنابة ، مش بنية انك حرّان ولا متسخ أو كدة

2️⃣ تعميم الجسد بالماء
تنزل تحت الدش ، أو تاخد المياه بأي حاجة وتنزل المياه على جسمك كله ، والمرأة لو عاملة ضفيرة يستحب تفكها وهي بتغتسل لكن مش واجب

👈 الصفة التانية بقه اللي هي المستحبة وسنة عن النبي ﷺ وطبعًا الأفضل :

1️⃣ النية ، ده ركن ثابت زي ما قلنا ، وتنوي بقلبك

2️⃣ غسل الكفين ثلاث مرات

3️⃣ غسل الفرج باليد اليسرى ثم تنظف يدك مرة أخرى

4️⃣ تتوضأ وضوءك للصلاة ، وممكن تأخر غسل رجلك للآخر

5️⃣ تخلل أصول شعر رأسك بالماء ثم تغسله ثلاث مرات

6️⃣ غسل جميع البدن ، تبدأ بالجانب الأيمن ثم الأيسر ثم تغسل قدميك

#رسايل