أسئلة فقهيه

[Osama Badr]

س/ شاب صحى من النوم محتلم ...المفروض يعمل ايه عشان يصلي ؟؟
*****
ج/ إذا وجد بلل في الملابس لازم يغتسل الأول عشان يعرف يصلي
👈لما روت عَائِشَةُ قَالَتْ : سُئِلَ رَسُولُ اللَّهِ ﷺ عَنْ الرَّجُلِ يَجِدُ الْبَلَلَ وَلا يَذْكُرُ احْتِلامًا . قَالَ : يَغْتَسِلُ . وَعَنْ الرَّجُلِ يَرَى أَنَّهُ قَدْ احْتَلَمَ وَلا يَجِدُ الْبَلَلَ . قَالَ : لا غُسْلَ عَلَيْهِ .
[رواه أبو داود (236) وحسنه الألباني في صحيح أبي داود (216) ]
والغسل ليه صفتان...الصفة الأولى أنه يعمم جسده بالماء بنية الغسل
والصفة التانية وهي سنة ... إنه ينوي الغسل ثم يتوضأ الأول ثم يغسل جانب جسمه اليمين ثم الجانب الشمال من جسده ثم يغسل باقي جسده
******

س/طيب لو اتوضأ وصلى من غير مايغتسل ؟؟
ج/ الصلاة كده باطلة ...لازم يغتسل الأول
********
س/حتى لو الاحتلام بيتكرر كل يوم وبيصحى مش فاكر حاجة بس بيشوف بلل في الملابس...هل لازم يغتسل منه كل مرة ؟؟
ج/اه لازم يغتسل كل مرة
العبرة بالبلل... إذا لقيت بلل يلزمك اغتسال
وإذا فاكر حلم ولم تجد بلل ...لا يلزمك الاغتسال
********
س/طيب اللي يصحى لصلاة الفجر في الشتاء وهو احتلم فلازم يغتسل والجو برد ينفع يأجل صلاة الفجر ويصليها قبل الظهر ؟؟
ج/لا ماينفعش ....لازم يصلي الفجر في وقته ...يسخن مياه بأي طريقة ويغتسل ويصلي الفجر في وقته
********
س/طيب أنا في الجيش والجو برد جدااااا ومافيش مياه سخنة ...أعمل ايه ؟؟
ج/إذا فعلاً حاولت في إنك توصل لمياه سخنة وماقدرتش والجو فعلا برد لدرجة انك مش هتقدر تستحمل المياه البارده يجوز ليك ساعتها التيمم وتصلي الفرض اللي عليك ...ويلزمك الاغتسال مع أول فرصه لتسخين المياه أو القدرة على الاغتسال بالماء البارد ((❌لو تيممت وانت قادر على الاغتسال الصلاة هتكون باطلة ❌))
******
س/التيمم بيكون ازاي ؟؟
ج/ تقول بسم الله ناوياً التيمم ، وبعدها تضرب بكف ايدك الاتنين الأرض او اي مكان فيه تراب ضربة واحدة ، وبعدها تمسح وجهك بايديك
ثم تمسح ظاهر كفك اليمين بإيدك الشمال ، وظاهر كفك الشمال بإيدك اليمين ..بس كدة
******
س/ هل يلزم تغيير كل الملابس بعد الاحتلام ؟؟
ج/لا يلزم تغيير كل الملابس ..
الملابس اللي جالها أثر من الاحتلام بس هي اللي يتغسل موضع وجود البلل فيها وممكن تلبسها تاني أو الأفضل تتغير ، ويجوز كمان فرك ((دعك)) أثر المني من الثياب لو كان جف كما كانت تفعل عائشة رضي الله عنها بثياب النبيﷺ

#رسايل